नक्कली भुटानी शरणार्थी बनाएर अमेरिका पठाउने गिरोहलाई सहयोग गरेको आरोपमा पूर्वमन्त्री तथा नेकपा एमालेका सचिव तथा सांसद टोपबहादुर रायमाझीलाई प्रहरीले पक्राउ गरेको छ । प्रहरीले सांसद रायमाझीलाई आज बिहान भैरहवाबाट पक्राउ  गरेको हो। 

उनलाई काठमाडौं ल्याउने तयारी भइरहेको छ । रायमाझी पक्राउ परेपछी नेकपा एमाले प्रहरीको अनुसन्धानलाई पुर्ण रुपमा सघाउने जनाएको छ।

रायमाझीका छोरा सन्दीप हिजो नै बुटबलबाट पक्राउ परेका छन् । उनलाई आज बिहान बुद्ध एयरको जहाजबाट काठमाडौं लगिएको  छ । उनलाई आज प्रहरीले अदालतमा पेश गर्ने तयारी गरिएको छ ।

सन्दीपको नाममा डेढ करोडको चेक काटिएको पनि भेटिएको छ ।

यस्तै तत्कालीन गृहमन्त्री एवं नेकपा एमालेका उपाध्यक्ष रामबहादुर थापा ‘बादल’ का छोरा प्रतीकलाई पनि प्रहरीले खोजी गरिरहेको छ ।

यसअघि बादलका तत्कालीन सुरक्षा सल्लाहकार इन्द्रजीत राईलाई प्रहरीले पक्राउ गरिसकेको छ । प्रहरीले यही प्रकरणमा उपराष्ट्रपति कार्यालयका सचिव टेकनारायण पाण्डेलाई पक्राउ गरेर अदालतमा पेश गरिसकेको छ ।