खेलकुद

नामिबियामा भइरहेको सिरिजको दोस्रो खेलमा नेपालको अर्को हार

अनलाइन नेपालगंज

सोमबार, १९ मंसिर २०७९

आइसिसी विश्वकप लिग-२ अन्तर्गत नेपाल, नामिबिया र स्कटल्‍यान्डबीचको त्रिकोणात्मक एकदिवसीय सिरिजको आफ्नो दोस्रो खेलमा नेपाल पराजित भएको छ।

नामिबियामा भइरहेको सिरिजको आफ्नो दोस्रो खेलमा नेपाललाई स्कटल्यान्डले ३ विकेटले पराजित गर्‍यो।

नेपालले दिएको १३८ रनको लक्ष्य स्कटल्यान्डले ७ विकेटको क्षतिमा ३२.१ ओभरमा पूरा गर्‍यो।

स्कटल्यान्डका लागि क्रिस्टोफर म्याकब्राइटले ४३ रन र ब्रेन्डन म्याकमलनले ३२ रन जोडे।

बलिङमा नेपालका सागर ढकाल, गुल्शन झा र ललित राजवंशीले २-२ विकेट लिए।

त्यसअघि टस हारेर पहिले ब्‍याटिङ गरेको नेपाललाई स्कटल्यान्डले ४०.१ ओभरमा १३७ रनमै अलआउट गर्‍यो।

नेपालका लागि आठौं नम्बरमा ब्याटिङ गरेका गुल्शन झाले सबैभन्दा बढी २९ रन जोडे। उनले २९ बलमा ३ चौका र १ छक्का हिर्काए।

त्यसअघि ओपनर अर्जुन साउद १८ रन र आसिफ शेख ७ रनमा आउट भए।

ज्ञानेन्द्र मल्लले २५ रन, कप्तान रोहित पौडेलले १७ र आरिफ शेखले १० रन जोडे। कुशल भुर्तेल ०, दीपेन्द्रसिंह ऐरी ९ रन, करण केसी ८ र ललित राजवंशी ३ रनमा आउट भए। सागर ढकाल ४ रनमा नटआउट रहे।

बलिङमा स्कटल्यान्डका क्रिस सोलले ३ विकेट र मार्क वाटले २ विकेट लिए।

सात राष्ट्र सहभागी लिगमा नेपाल पुछारबाट दोस्रो स्थानमा छ। खेल्‍नु पर्ने ३६ खेल मध्ये नेपालले २२ खेल खेल्दा १८ अंक जोडेको छ। नेपालले २२ मध्ये १२ खेलमा हार बेहोरिसकेको छ।