खेलकुद

फागुन २९ गतेदेखि धनगढीमा प्रथम मुख्यमन्त्री कपअन्तर प्रदेश खेलकुद प्रतियोगिता संञ्चालन गरिने

अनलाइन नेपालगंज

आईतवार, १९ फाल्गुन २०७५

आगामी फागुन २९ गतेदेखि धनगढीमा प्रथम मुख्यमन्त्री कपअन्तर प्रदेश खेलकुद प्रतियोगिता संञ्चालन गरिने भएको छ । सुदूरपश्चिम प्रदेश सरकारको आयोजनामा हुने प्रतियोगिताको तयारी तीव्र रुपले भइरहेको सामाजिक विकास मन्त्रालयले जानकारी दिएको छ ।

मन्त्रालयले आज बिहान पत्रकार सम्मेलको आयोजना गर्दै प्रतियोगिको तयारीबारे जानकारी गराएको हो । प्रतियोगितामा फुटबल, भलिबल, क्रिकेट र ब्याडमिन्टनका खेलहरु समाबेश हुने सामाजिक विकास मन्त्री कृष्णराज सुवेदीले जानकारी दिनुभयो ।

फुटबल बाहेक अन्य खेलमा महिला र पुरुष दुबै टोली सहभागि हुने उहाँले बताउनुभयो । प्रतियोगितामा सबै प्रदेशका खेलाडीहरु सहभागि हुने बताइएको छ । प्रत्येक प्रदेशबाट सबै विधाका ७८ खेलाडी, ७ प्रशिक्षक र ७ व्यवस्थापक गरेर जम्मा ६ सय ४४ जनाको सहभागिता रहने मन्त्री सुवेदीले बताउनुभयो ।

प्रतियोगितामा स्वर्ण पदक प्राप्त गर्ने खेलाडीलाई मेडल तथा प्रमाणपत्रसहित जनही १० हजार रुपैयाँ पुरस्कार दिइने छ । प्रतियोगितामा सर्वाधिक स्वर्ण पदकका साथ प्रथम हुने प्रदेशलाई १५ लाख रुपैयाँ, द्वितीयलाई ८ लाख रुपैयाँ र तृतीयलाई ५ लाख रुपैयाँ पुरस्कार प्रदान गरिने छ ।

प्रतियोगिता आगामी चैत्र ३ गते सम्पन्न हुने सामाजिक विकास मन्त्रालयले जनाएको छ । अन्तर प्रदेश खेलकुद प्रतियोगिता सञ्चालनका लागि सुदूरपश्चिम प्रदेश सरकारले एक करोड ५० लाख रुपैयाँ विनियोजन गरेको छ ।

रकम अपुग हुने देखिएपछि थप ५० लाख माग गरिएको छ । प्रतियोगिताको उद्वघाटनका लागि प्रधानमन्त्री, राष्ट्रपति वा उप–राष्ट्रपति मध्ये एकजनालाई निमन्त्रणा गरिने मन्त्रालयले तयारी छ ।
–साभार : थाहा खबर